چرۆ محەممەد شەریف ئەندامی پەرلەمانی عێراق لە فراکسیۆنی یەکێتی نیشتمانی کوردستان لە وتووێژی لە گەڵ پەیامنێری جام کوردی ڕایگەیاند: ڕاستە ڕۆژی 14 ی 4 بۆ گەلی کورد ڕۆژێکی پڕ لە ئازار و ناڕەحەتییە، بەڵام لەو ڕۆژەدا ئێمە توانیمان تۆزێک لەو نەهامەتییانەی گەلی کورد کەم بکەینەوە، بەوەی کە هەڵەبجەمان کردە چوارەمین پارێزگای هەرێمی کوردستان و نۆزدەیەمین پارێزگای عێراق.
ناوبراو وتی: وەک کچە هەڵەبجەییەک بەتایبەت لەم خولەی پێنجەمی پەرلەمانی عێراقدا بۆ ئەوە هاتوومەتە ناو پەرلەمان کە بتوانم هەوڵێکی لەوجۆرە بدەم کە هەڵەبجە ببێت بە پارێزگا.
چرۆ محەممەد شەریف وتی: گرنگی بە پارێزگابوونی هەڵەبجە لەوەدایە کە لە بودجەی پەرەپێدانی پارێزگاکان بودجەی بۆ دیاری دەکرێت، لە گەڵ ئەوەشدا چەند خاڵێکی سنوری لە هەڵەبجەدا بوونی هەیە بۆ لەمەودوا ئەو خاڵە سنوریانە دەبن بە فەرمی.
ئەندامەکەی پەرلەمانی عێراق لە درێژەدا وتی: فەرمانگە فیدراڵییەکان لە ناو هەڵەبجەدا بوونیان هەیە، بەڵام هەر فەرمانگەن و بەڕێوەبەرایەتی نین، بەڵام لە دواجاردا ئەوانە دەبن بە بەڕێوەبەرایەتی کە ئەمەش دەستکەوتێکی باش دەبێت بۆ هەڵەبجە.
ناوبراو وتی: کردنی خاڵە سنورییەکان بە فەرمی دەبێتە هۆی ڕەخساندنی هەلی کاری زیاتر بۆ گەنجانی پارێزگای هەڵەبجە./.
