دکتۆر فەرهاد تۆفیق وتەبێژی فەرمی پارتی سۆسیال دیمۆکراتی کوردستان لە وتووێژی لە گەڵ پەیامنێری جام کوردی ڕایگەیاند: پرسی بەپارێزگابوونی هەڵەبجە پرسێکی زۆر گرنگە، بەر لە هەموو شتێک بۆ هەرێمی کوردستان و پەیوەست بە پرسی کوردەوە، چونکە لە سەر دوو ئاست کە ئەوانیش لە سەر ئاستی زیادبوونی ژمارەی پارێزگاکان و دیاریکردنی بودجە بۆ پەرەپێدانی پارێزگاکان، چونکە ئەو دەستکەوتە مادییانەی کە بۆ پارێزگاکان تەرخان دەکرێت جیاوازە لەو بودجەیەی کە بۆ قەزاکان تەرخان دەکرێت، تەنانەت لە دیاریکردنی پلە و پۆست و ڕێکارە ئیدارییەکاندا جیاوزییەکی زۆر هەیە، بۆیە لەم ڕووەوە حکومەتی هەرێمی کوردستان سودی لێ دەبینێت.
ناوبراو وتی: لە ڕووی دیاریکردنی ڕێژەی کورسی بۆ پارێزگاکە دیسانەوە کاریگەری خۆی هەیە، هەروەها لە ڕووی سیاسیشەوە دیسانەوە کاریگەری هەیە، بەتایبەت پەیوەست بەو پرسانەی کە لە داهاتوودا دێنە پێشەوە. بوونی پارێزگای هەڵەبجە جیاوزی هەیە لە گەڵ ئەوەی کە هەرێمی کوردستان تەنیا پێکهاتبێت لە سێ پارێزگای دیاریکراو، بۆیە لەم ڕوانگەوە پەیوەست بە هەرێمی کوردستان کاریگەری باشی هەیە و دەستکەوتێکی گەورەیە.
فەرهاد تۆفیق وتی: بە پارێزگابوونی هەڵەبجە بە نیسبەت هاووڵاتیانیشەوە دیسانەوە دەستکەوتێکی گەورە و کاریگەرییەکی گرنگی هەیە، چونکە بەر لە هەموو شتێک لە ڕووی دەرونییەوە جۆرێکە لە قەرەبووکردنەوەی ئەو قوربانیدانەی کە پارێزگای هەڵەبجە داوێتی، کە بەدەست ئەو حکومەتەی کە لە دوای ململانێیەکی زۆر بڕیاری بە پارێزگابوونەکەی دا کە میراتگری حکومەتەکانی پێشخۆیەتی، کە تاکە پارێزگایەکە لە لایەن حکومەتەکەی خۆیەوە کیمیاباران کرابێت، لە بەر ئەوە بە پارێزگابوونی هەڵەبجە گرنگی گەورەی هەیە بۆ دانیشتووانی ناوچەکە.
وتەبێژی پارتی سۆسیال دیمۆکراتی کوردستان وتی: بە نیسبەت پارتە سیاسیەکانیشەوە بە پارێزگابوونی هەڵەبجە، جگە لە بەرژەوەندییە حیزبیەکە، بەشێک لەو پارتانە بۆ ئەوە خەباتیان کردووە بۆ ئەوەی گەلەکەیان بە مافەکانی خۆی بگات، بۆیە خەبات کراوە، بۆیە ئێستا بە پارێزگابوونی هەڵەبجە بەشێکی کەمە لەو مافانەی کە بەو پارێزگایە دراوە.
فەرهاد تۆفیق وتەبێژی وتی: ئەوان وەکو پارتی سۆسیالیست دیمۆکراتی کوردستان، وێڕای ئەوەی کە پیرۆزباییان هەیە بۆ سەرجەم دانیشتوانی پارێزگای هەڵەبجە، لە هەمانکاتیشدا دڵخۆشن بەو هەوڵ و ماندووبونەی کە هەموو لایەنەکان بە گوێرەی توانای خۆیان و قەبارەی خۆیان داویانە و ئەنجامێکی باشی هەبووە، بەڵام لە هەمانکاتدا پێیانوایە ئەمە کەمترین قەرەبوکردنەوەی پارێزگای هەڵەبجەیە، چونکە پارێزگای هەڵەبجە پێویستی بە قەرەبووکردنەوەی زۆر لەوە زیاتر هەیە جا چ قەرەبووکردنەوەی مادی بێت یاخود قەرەبووکردنەوەی مەعنەوی، چونکە هەڵەبجە نابێت تەنیا وەک پارێزگایەکی ئاسایی مامەڵەی لە گەڵدا بکرێت، بەڵکوو دەبێت قەرەبووی هەموو ئەو زیانانە بکرێتەوە کە بەرامبەری کراوە، کە ئەمە دیسانەوە بۆ گەرمیانیەکانیش ڕاستە کە ژمارەیەکی زۆر دانیشتوانی ئەنفالکراون و لە سەر بنەمای ئەم دانیشتوانە ئێستا بودجە دیاری دەکرێت، ئێستا هەم جارێک قوربانیان پێدراوە جارێکیش لە بەر ئەوەی ڕێژەی دانیشتوانەکەی کەمترە بودجەی کەمتری بۆ دیاری دەکرێت کە ئەمەش دیسانەوە هەرێمی کوردستانیش زیانی لێدەکات، بۆیە گرنگە هەموو لایەنە سیاسیەکان هەوڵەکانیان بخەنەگەڕ بۆ ئەوەی قەرەبووی ماددی و مەعنەوی خەڵکی هەڵەبجە بکرێتەوە و بودجەی تایبەتی بۆ دیاری بکرێت و زیاتر ئاوەدان بکرێتەوە، بەتایبەت کە هەڵەبجە پێکهاتەیەکی گرنگی هەیە هەم لە ڕووی جوگرافییەوە هەمیش لە ڕووی ئەوی کە ناوچەیەکی بەپیتی کشتوکاڵییە و هەروەها ناوچەیەکی گرنگی بازرگانییە و کۆمەڵێک دەروازەی سنوریی گرنگی هەیە کە گرنگە بکرێن بە نێودەوڵەتی کە ئەوەش کاریگەری لە سەر ئاوەدانکردنەوەی پارێزگاکە دەبێت، هەم لە ڕووی ڕۆشنبیریشەوە خاوەن تایبەتمەندیی خۆیەتی بۆیە ئەم تایبەتمەندییانەی هەڵەبجە دەخوازێت هەموو لایەنەکان پێکەوە ئیش لە سەر ئەوە بکەن کە هەم سنورەکەی فراوان بکرێت هەم قەرەبووی ماددی و مەعنەوی بکرێتەوە.
ناوبراو وتی: هەڵەبجە خاوەن کۆمەڵێک دەروازەی فەرمی و نافەرمیشە، کەدەکرێت ئەم دەروازانە هەمویان بکرێنەوە هەم لە سەر ئاستی حکومەتی فیدراڵی هەم لە سەر ئاستی ئێران کە ئەم دەروازانە بکرێنەوە و لە ڕێگەی ئەو دەسەڵاتانەی کە دراوە بە پارێزگاکان، بە دڵنیایەوە پەیوەندی پارێزگای هەڵەبجە لە گەڵ کۆماری ئیسلامی ئێران دا گەشەسەندوتر و باشتر دەبێت، دیارە لە ڕابردودا ئەو پەیوەندییەی کە پارێزگای سلێمانی لە گەڵ پارێزگای سنەدا هەیبوو، بەدڵنیایەوە پەیوەندی هەڵەبجە لە گەڵ ئێراندا زیاتر دەبێت، بەتایبەت کە هەڵبجە خاوەن ژمارەیەک دەروازەی سنورییە و لە گەڵ ئەوەشدا پەیوەندییە کۆمەڵایەتییەکانیش لەو سنورە بەهێزترن، بە دڵنیاییەوە لەمەودوا پەیوەندییەکان بەهێزتردەبن، بەراورد بە ئێستا./.
