فەریقی یەكەم جەبار یاوەر شارەزای بوارەکانی سەربازی و ئەمنی لە وتووێژی لە گەڵ پەیامنێری جام كوردی ڕایگەیاند: لە پاش ئەو كۆبوونەوانەی كە پێشتر ئەنجامدران ساڵی پار لە نێوان شاندە باڵاكانی حكومەتی عێراق و حكومەتی توركیا لە ئەنکەرە و لە بەغدا كە شاندەكان پێكهاتەكانیان لە كەسانی باڵای بواری سەربازی و ئەمنی و هەواڵگری و ئابوری و بازرگانی بوون، دواتر سەردانی ئەردۆغانیش بۆ بەغداد بە یاوەری شاندێكی باڵای سەربازی و ئەمنی و هەواڵگری و ئابوری و بازرگانی، كە بەرهەمەكەی واژۆکردنی 23 یاداشتنامە و ڕێكەوتنی نێوان توركیا و عێراق بوو لەو بوارانەدا كە وتمان، لەڕاستیدا هەندێك لەو ڕێككەوتننامانە بەتایبەت لە بواری ئەمنی و سەربازی، ڕوون و ئاشكرا نین.
ناوبراو وتی: بە هۆی ئەو بێدەنگبوونەی عێراق بەگشتی و حكومەتی هەرێم بەتایبەتی كە بەردەوام نوێنەری لەناو شاندەكاندا هەبووە لە ئەنکەرە و بەغدا، بە پێی ئەو بۆردومانانەی كە دەكرێن و ئەو هێرشانەی لە لایەن فڕۆكەكانی توركیاوە دەكرێن، تۆپبارانكردن و ئۆپەراسیۆنی سەربازی لە سەر زەوی و هاتنەناوەوەی زیاتر بۆ قوڵایی 40 كیلۆمەتر لە سنوری توركیا و بە درێژایی 200 كیلۆمەتر لەهەموو سنورەكان و بەتایبەتتریش زیاتر ڕووداوەكانی بۆردوكانكردن لەم دواییەدا لە سنوری سلێمانی و هەولێر و لە ناوچەكانی سەیدسادق كە دوو ئافرەتی مەدەنی شەهید بوون و لە قەزای سیدەكان كە كەسێكی مەدەنی بە ئامانجگیرا، هەروەها ڕۆژانی ڕابردوو لەناوچەی خەلەكان بەهەمان شێواز باوكێك و دوو كوڕ شەهید بوون، دیسان بە هۆی بۆردومانێك سێ كەسیتر لەناوچەكانی زەلان شەهیدبوون كە یەكێكیان منداڵە و بە پێی زانیارییەكان كالولەی لە دەست بووە و نەخۆش بووە، كەواتە تەنها لەم سێ ڕۆژەی ڕابردوودا نۆ كەسی مەدەنی شەهید بوون بە هۆی ئەو بۆردوومانانەوە، هەروەها بە پێی ئەو ئامارانەی كە دەكرێت لە لایەنی پۆلیسی پاسەوانی سنور، تاكو كۆتایی مانگی هەشت 348جار پرۆسەی سەربازی توركیا بە هۆی فڕۆكەی شەڕکەر و درۆن و بۆردومان و ئۆپەراسیۆنی سەربازییەوە ئەنجامدراوە لە ئاسمان و زەمینی هەرێمدا.
ئەمینداری گشتی پێشووی وەزارەتی پێشمەرگە وتی: لە ڕووی دەستوری و یاساییەوە ئاسمان و زەوی هەرێم بەشێكە لە هی عێراق و ئەمە بابەتێكی سیادییە، دەبێت حكومەتی عێراق لە سەر ئەم بابەتانە بێتەدەنگ، ئەگەر عێراق لە سەر سەروەری خۆی بەدەنگ نایەت، ئەوا لە سەر ئەو هاووڵاتیانە بەدەنگ بێت كە هاووڵانی مەدەنین و بە هۆی ئەو شەڕانەوە كە 40 ساڵە بەردەوامە لە نێوان دەوڵەتی توركیا و پارتی كرێكارانی كوردستاندا و تا ئێستا هەردوولایان نەگەیشتوون بە ڕێكەوتن و توركیا و پارتی كرێكارانیش هیچ ئامانجێكی خۆیان بەدینەهێناوە و ئێمە لەو بڕوایەداین بە هۆی ئەم شەڕەوە، هیچیان ناگەنە ئەنجامی كۆتایی خۆیان.
ناوبراو لە درێژەدا وتی” ئەگەر عێراق و هەرێمی كوردستان لە سەر ئەو شەڕە و مەسەلەی سەروەری خاك و ئاسمانی عێراق نەیەنە دەنگ، بەڵام خۆدەبێت لە سەر شەهیدكردنی خەڵكی مەدەنی بەدەنگ بێن كە هاووڵاتی ئاسایین و هیچ پەیوەندییان بەو شەڕەوە نییە.
جەبار یاوەر وتی: بە پێی یاساكانی نێودەوڵەتی تەنانەت ئەگەر دوو وڵاتیش شەڕیان بێت، نابێت بە هیچ شێوازێك هەریەكێك لەو وڵاتانە بۆردومانی هیچ شوێنێكی ئەو وڵاتەكەی دیكە بكات تەنانەت ئەگەر سەربازگەیەكی دوژمنیش نزیكی ناوچەیەكی نیشتەجێی مەدەنی بێت. بەڵام ئێستا ئێمە دەیبینین ئەو بۆردومانانەی توركیا لە سەر ڕێگە گشتییەكان دەكرێن كە بەهەزارەها ئۆتۆمبێل ڕۆژانە پێیدا تێدەپەڕێت و دەبنە مەترسی بۆ سەر هاووڵاتیانی دیكە.
ناوبراو وتی: ئەو ناوچانەی توركیا بۆردومانیان دەكات ناوچەی شەڕ نین، چونكە ناوچەكانی شەڕ لە سەرتاسەری سنورەكانی توركیا – عێراقن، بەڵام ئەمانە ناوچەی قوڵایین كە هەندێكیان بە 200 كیلۆمەتر یان 300 کیلۆمەتر دوورە لە سنوری توركیا.
وتیشی: ئەم بۆردومانانە بووەتە كارەساتێك كە ڕۆژانە دووبارە دەبێتەوە بە هۆی ئەو شەڕەی نێوان توركیا و پارتی كرێكاران و هیچ پەیوەندی بە هەرێمی كوردستانەوە نییە./.
