بە پێی ڕاپۆرتی جام کوردی، سەید عەباس عێراقچی ئەمڕۆ چوارشەممە لە پەکین لە گەڵ وانگ یی وەزیری دەرەوەی چین کۆبووە.
وانگ یی لەو کۆبوونەوەدا وتی: ئێران هاوبەشی ستراتیژیی ئێمەیە لە ڕۆژهەڵاتی ناوەڕاستدا و دۆستایەتی نێوان هەر دوو وڵات لە تاقیکردنەوەی هەوراز و نشێوە نێودەوڵەتییەکاندا بەردەوام بووە و گەشەپێدانی پەیوەندییەکانی پەکین و تاران هەڵبژاردەیەکی هاوبەشە بۆ هەر دوو لا.
وەزیری دەرەوەی چین وتی: لە ساڵانی ڕابردوودا ئێران و چین لە کاتە دژوارەکاندا هاوکاری یەکتریان کردووە و بە گرتنەبەری ئەو هەنگاوانە متمانەی سیاسیی یەکتریان لە پشتیوانیکردندا قووڵتر کردووە و پەیوەندییە هاوبەشەکانیان لە هاوکاریی کردەییدا بەهێزتر کردووە و لە بەرەنگاربوونەوەی تاکجەمسەریدا لە یەک بەرەدا بوون./.
