جام کوردی - سەرۆکوەزیرانی پاکستان، لە کاتێکدا هەڵسەنگاندنێکی «زۆر ئەرێنی» بۆ پەیوەندییە دیپلۆماسییەکانی ئەم دواییەی لەگەڵ ئێران و وڵاتانی تری ناوچەکە دەکات، جەخت لەسەر بەردەوامبوونی هەوڵەکانی ئیسلام ئاباد بۆ کەمکردنەوەی گرژییەکان، گێڕانەوەی ئاشتی بۆ ڕۆژهەڵاتی ناوەڕاست و گێڕانی ڕۆڵێکی بنیاتنانەر لە گۆڕانکارییەکانی ناوچەکەدا دەکاتەوە.
«شەهباز شەریف» سەرۆکوەزیرانی پاکستان، ئەمڕۆ (چوارشەممە) لە کۆبوونەوەی کابینەی وڵاتەکەی لە ئیسلام ئاباد، بە ئاماژەدان بەو دۆخەی کە بەهۆی بەرزبوونەوەی نرخی نەوتی جیهانییەوە دروست بووە، ڕایگەیاند کە وڵاتەکەی بەردەوام دەبێت لە هەوڵە دیپلۆماسییەکانی بۆ گەڕاندنەوەی ئاشتی و سەقامگیری بۆ ناوچەی ڕۆژهەڵاتی ناوەڕاست.
سەرۆکوەزیرانی پاکستان پەیوەندییەکانی ئەم دواییەی نێوان ئیسلاماوا، تاران و یاریکەرە سەرەکییەکانی تری ناوچەکەی بە زۆر بنیاتنانەر وەسف کرد. ناوبراو بە بیرهێنانەوەی کۆبوونەوەی ئەم دواییەی بەرپرسانی ئێران، پاکستان، تورکیا و عەرەبستانی سعودی لە تاران لەبارەی «ڕێککەوتنی بەرگریی هاوبەشی مەککە»، کەشوهەوای ئەم دانوستاندنانەی بە ئەرێنی هەڵسەنگاند و زیادی کرد کە لایەنەکان بیروڕایان لەسەر ڕێگاکانی کەمکردنەوەی گرژییە ناوچەیییەکان ئاڵوگۆڕ کردووە.
شەریف هەروەها ئاماژەی بە ڕۆڵی نێوەندگیریی ئیسلام ئاباد لە گۆڕانکارییەکانی ڕابردوودا کرد، لەوانە هەوڵدان بۆ ڕاگەیاندنی ئاگربەست و دانوستاندنەکانی نێوان ئێران و ویلایەتە یەکگرتووەکان، و جەختی لەوە کردەوە کە پاکستان وەک ڕابردوو هەوڵ دەدات لە ڕێگەی دیپلۆماسی و هاوکاری لەگەڵ وڵاتانی وەک قەتەرەوە، ڕێگاکارێکی ئاشتییانە بۆ کۆتاییهێنان بە گرژییەکان و ناکۆکییە هەنووکەیییەکان بدۆزێتەوە؛ ئەمەش لە کاتێکدایە کە تاران هێشتا پێداگری لەسەر جێبەجێکردنی مەرج و شێوازە ڕاگەیەندراوەکانی خۆی دەکاتەوە.