ڕاهێنەرە کرواتییەکە ئێستا دەست بە چالێنجێکی نوێ دەکات لە تۆپی پێی ئاسیادا، دوای ئەوەی کۆتایی بە هاوکارییەکانی لەگەڵ کرواتیا هێنا. دوای نزیکەی ٩ ساڵ لەسەر کورسی کرواتیا، دالیچ یەکێک لە قۆناغە سەرکەوتووەکانی مێژووی تۆپی پێی وڵاتەکەی دامەزراند.
لە مۆندیالی ٢٠١٨ی ڕووسیا لەگەڵ هەڵبژاردەی کرواتیا گەیشتە یاری کۆتایی و دوای چوار ساڵ توانی نازناوی پلەی سێیەم لە مۆندیالی ٢٠٢٢ی قەتەر بەدەستبهێنێت. ئەم ئەنجامانە وایکرد وەک سەرکەوتووترین ڕاهێنەر لە مێژووی هەڵبژاردەی کرواتیادا بناسرێت.
ڕاهێنەرە تەمەن 59 ساڵەکە دوای دوورکەوتنەوەی کرواتیا لە مۆندیالی 2026 و شکستەکەی لەلایەن پورتوگالەوە دەستی لە پۆستەکەی کێشایەوە، دوای ماوەیەکی کەمیش پێشنیاری ئیماراتی قبوڵکرد. ئێستا، ئەرکی ئامادەکردنی هەڵبژاردەی ئیمارات بۆ پێشبڕکێکانی داهاتووی ئاسیا و ئامانجە درێژخایەنەکانی تۆپی پێی وڵاتەکەی پێسپێردراوە.
هەروەها هەڵبژاردنی دالیچ بۆ تۆپی پێی ئیمارات گەڕانەوەیە، چونکە پێش ئەوەی ڕاهێنەری کرواتیا بگرێتە ئەستۆ، ئەزموونێکی سەرکەوتووی لە تۆپی پێی وڵاتەکەدا هەبووە. دالیچ لە ساڵی ٢٠١٤ تا ٢٠١٧ سەرکردایەتی یانەی عەینی کرد بۆ سەرکەوتن لە نێویاندا بردنەوەی جامی سەرۆکی ئیمارات.
فیدراسیۆنی تۆپی پێی ئیمارات هیوادارە هەبوونی ڕاهێنەرێکی خاوەن ئەزموونی نێودەوڵەتی وەک دالیچ یارمەتی گەشەکردنی هەڵبژاردەی وڵاتەکەی بدات.
ئیمارات لە ساڵانی ڕابردوودا زۆر کاردەکات بۆ گەڕانەوە بۆ ئاستی سەرەوەی تۆپی پێی ئاسیا، دامەزراندنی ڕاهێنەرێکی خاوەن ئەزموونی بەشداریکردن لە قۆناغەکانی کۆتایی مۆندیالیش بەشێکە لەو پلانە.
شێوازی کارکردنی دالیچ لەسەر بنەمای دیسیپلینی تاکتیکی و ڕێکخستنی بەرگری بەهێز و بەکارهێنانی زیرەکی توانای یاریزانەکانە. ناوبراو لە کرواتیا نیشانیدا کە دەتوانێت تیپێکی ڕکابەری دروست بکات بەبێ ئەوەی تەنها پشت بە ئەستێرە گەورەکان ببەستێت، ئێستاش دەبێت هەمان فەلسەفە لە هەڵبژاردەی ئیماراتدا جێبەجێ بکات.
پێدەچێت یەکەم ئامانجی گەورەی دالیچ ئامادەکردنی ئیمارات بێت بۆ پاڵەوانێتییە گەورەکانی تۆپی پێی ئاسیا، هاندەرانیش هیوادارن هاتنی خاوەن میدالیای مۆندیال بتوانێت سەردەمێکی نوێ بۆ هەڵبژاردەی تۆپی پێی وڵاتەکە دەستپێبکات.