چیرۆکی تیپی باسکە مۆناکۆ پێی ناوەتە قۆناغێکی گرینگەوە. پاڵەوانی وەرزی ڕابردووی تۆپی باسکەی فەرەنسی کە پێشتر دووجار لەلایەن دامەزراوە وەرزشییەکانەوە مۆڵەتی بەشداریکردن لە وەرزی 2026-2027ی پێنەدرابوو، ئێستا هەوڵدەدات دوا هەلی گەڕانەوەی خۆی بۆ یانەی بێتکلیک ئێلیت بپارێزێت.
لە دوایین ڕووداودا، پرۆژەیەک کە ناوی ڕۆناڵدینۆی ئەستێرەی پێشووی تۆپی پێی بەڕازیلی تێدا هاتبوو، لەلایەن دەسەڵاتدارانەوە ڕەتکرایەوە و تیپی مۆناکۆ ناچار بوو پلانێکی نوێ بۆ ڕزگارکردنی یانەکە بخاتەڕوو کە دوێنێ لە کۆبوونەوەیەکدا لەگەڵ لیژنەی نیشتمانی ئۆڵۆمپی و وەرزشی فەرەنسا تاوتوێ کرا و بڕیارە لە ماوەی 48 کاتژمێردا بڕیاری کۆتایی ڕابگەیەندرێت.
خاڵی سەیر لەوەدایە کە پلانی دارایی پێشنیارکراو لە ماوەیەکی کورتدا گۆڕانکاری بەسەردا هاتووە. بەگوێرەی ماڵپەڕی بیباسکێت، لەکاتێکدا بەیانی سێشەممە بە بڕی 12.5 ملیۆن یۆرۆ گفتوگۆ لەسەر بودجە دەکرا، پلانە نوێیەکە لە دەوروبەری 6-7 ملیۆن یۆرۆیە، یانەکەش لە بنەڕەتدا دەبێت بەشێکی زۆری پێکهاتەکەی بنیات بنێتەوە.
مۆناکۆ لە حاڵێکدا شەڕی مانەوە دەکات کە وەک پاڵەوانی فەرەنسا و یەکێک لە تیپە پێشەنگەکانی تۆپی باسکە لە ئەوروپادا دادەنرێت، بەڵام ڕەنگە وەرزی داهاتوو بە هیچ شێوەیەک ڕێگەی پێنەدرێت بەشداری خولی پڕۆفشناڵی فەرەنسا بکات.