مەسعوود پزیشکیان، سەرۆک کۆماری ئێران، لە گفتوگۆیەکی کورتدا لەگەڵ تۆڕی هەواڵیی «ئێن بی سی» (NBC) و چەند میدیایەکی دیکە لە پەراوێزی کۆبوونەوەی کۆمەڵەی گشتیی نەتەوە یەکگرتووەکاندا ڕایگەیاند: «ئێمە نامانەوێت کارەکە بکێشێتە هەڵبژاردنە نیوەدەورەییەکانی ئەمریکا.»
مەسعوود پزیشکیان لەم دیدارەدا بە ئاماژەدان بە لێکتێگەیشتنێکی نێوان ئێران و ئەمریکا کە پلانەکانی بۆ ئاگربەستێکی کاتی دەستنیشان کردبوو، وتیشی: ئێمە دەمانەوێت ئەمریکییەکان پێش هەڵبژاردنە نیوەدەورەییەکان بگەڕێنەوە سەر ئەو لێکتێگەیشتنە.
ناوبراو سەبارەت بە بارودۆخی ئێستای ڕێبەری ئێران ئاشکرای کرد کە دوو جار لەگەڵ ڕێبەری نوێی کۆماری ئیسلامیدا کۆبۆتەوە؛ لەوانەش مانگێک لەمەوبەر کە دیدارەکەیان حەوت کاتژمێری خایاندووە.
پزیشکیان ئاماژەی بەوە کرد کە لە میانی دیدارەکاندا «هیچ جۆرە کێشەیەکی لە دۆخی تەندروستی یان شێوازی جەستەیی» ڕێبەردا بەدینەکردووە و ئەوەشی خستەڕوو کە ئەوان لەسەر زەوی و لەسەر پاڵپشتییە نەریتییەکان دانیشتبوون.
سەرۆک کۆماری ئێران هاوکات بە کورتی باسی لە پرسە گرنگ و کاریگەرەکانی دیکەی سەر پەیوەندییەکانی تاران و واشنتۆن کرد.
هەروەها دەنگۆکانی سەبارەت بە نیازی ئێران بۆ تیرۆرکردنی ترەمپ ڕەتکردەوە و جەختی لەوە کردەوە کە حکوومەتی ئێران بەدوای تیرۆرکردنی سەرۆکی ئەمریکادا نییە.
پزیشکیان وتی: «هەڵوێستی حکوومەتی ئێران هەرگیز ئەوە نەبووە کە بیەوێت ترەمپ یان ئەندامانی خێزانەکەی تیرۆر بکات.»