ئومێد جاف ئاماژەی بەوە دا کە لە ٩ی نیسانی ٢٠٠٣دا، سوپای هاوپەیمانان بە پێشەوایەتی ئەمریکا و بەریتانیا بە بەهانەی درۆینەی بوونی «چەکی کۆمەڵکوژ» عێراقیان داگیرکرد.
ناوبراو ڕوونی کردەوە کە دوای زیاتر لە ٢٣ ساڵ، بە ڕاپۆرتە فەرمییەکانی نەتەوە یەکگرتووەکان سەلما کە هەموو ئەو ئیدیعایانە پووچ بوون و هیچ چەکێکی لەو جۆرە بوونی نەبووە.
ئەو شرۆڤەکارە یاساییە باسی لە بڕیاری ١٤٨٣ی ئەنجومەنی ئاسایشی نەتەوە یەکگرتووەکان ( لە ٢٢ی ئایاری ٢٠٠٣) کرد کە بەڕوونی دانی نا بە دەسەڵات و بەرپرسیارێتییەکانی ئەمریکا و بەریتانیا وەک دەسەڵاتی داگیرکەر، بڕیارێک کە تەنانەت کوفی عەنان، ئەمینداری گشتیی ئەوکاتی نەتەوە یەکگرتووەکانیش جەختی لێکردبووەوە.
جاف لە وەڵامی پرسیاری ئایا هاوپەیمانان بەرپرسیارێتیی خۆیان جێبەجێ کرد؟ ڕایگەیاند: «نەخێر! ئەوەی دوای ٢٣ ساڵ لەم بڕیارە دروست بوو، تەنها وێرانکردنی تەواوەتیی ژێرخانی ئابووری و خزمەتگوزارییەکان، هەڵوەشاندنەوەی دامەزراوە حکومییەکان و سوپای عێراق، و دروستکردنی بۆشایی ئەمنی بوو. ئەم سیاستە هەڵانەی ئەمریکا زەمینەی ڕەخساند بۆ سەرهەڵدانی گرووپە توندڕەوەکان و دروستبوونی داعش و هەڵگیرسانی جەنگی ناوخۆیی، کە سەرمایەی مرۆیی، زانستی و تەکنەلۆژیی عێراقی لەناو برد. ئێستا عێراق گۆڕەپانی تەقینەوەی هەزاران بۆمبی چێنراوی ناکۆکی و دووبەرەکی نەتەوەیی و ئایینییە کە ئیمپریالیزم چاندوویەتی.»
ئەو شرۆڤەکارە سیاسییە ئاماژەی بەوەش کرد کە دوای ئەم هەموو وێرانکارییە، هاوپەیمانان بە پێشەوایەتی ئەمریکا بڕیاری پاشەکشەیان داوە و عێراقێکی برینداریان بەجێهێشتووە؛ عێراقێک کە پێویستی بە زیاتر لە ٢٣ ساڵی ترە تەنها بۆ ئەوەی بگەڕێتەوە دۆخی پێش داگیرکاری لە ساڵی ٢٠٠٢.
لە بەشێکی تری وتوێژەکەدا لەگەڵ "جام کوردی"، ئومێد جاف جەختی لەوە کردەوە کە چارەسەری ڕاستەقینە لە دەستی هیچ هێزێکی دەرەکی و ڕۆژئاواییدا نییە، بەڵکو دەبێت گەلی عێراق و سەرکردایەتییەکی دڵسۆز و نیشتمانی ئەم نەخشەڕێگەیە جێبەجێ بکلەن:
- هەموو لایەک دەوڵەت بە دەسەڵاتی شەرعیی خۆیان بزانن، نەک حزبی خۆیان، و چەک تەنها لە چوارچێوەی سوپای دەستوری و دامەزراوە فەرمییەکانی دەوڵەتدا کۆبکرێتەوە.
- کۆتاییهێنان بە سیاسەتی دووفاقی، ناتەبایی و ئەو هاندانی تائیفییەی کە داگیرکاران جێیان هێشتووە.
- تەرخانکردنی داهاتی نەوت و سامانی نیشتمانی بۆ گەلی عێراق، نەک بۆ بەرژەوەندیی حزبی و ئەجێندای زیانبەخشی دەرەکی.
- بنیادنانی دەوڵەتێکی بەهێز کە تەواوی پێکهاتە ڕەسەنەکان—عەرەب، کورد، تورکمان، شیعە، سوننە و مەسیحی—بە ئاسوودەیی و شکۆمەندییەوە تێیدا بژین.
لە کۆتاییدا ئومێد جاف ڕایگەیاند: پەیڕەوکردنی ئەم هەنگاوانە تاکە ڕێگەی ڕاستەقینەیە بۆ قەرەبووکردنەوەی زیانەکانی ٢٣ ساڵ لە داگیرکاریی ئەمریکا و ئاژاوەگێڕی، و دروستکردنی ئایندەیەک کە شایستەی سەروەریی تەواوەتیی گەلی عێراق بێت.