جام کوردی - ئیسماعیل بەقائی وتەبێژی وەزارەتی دەرەوەی کۆماری ئیسلامیی ئێران لە کۆنگرەیەکی ڕۆژنامەوانی هەفتانەیدا لەگەڵ ڕۆژنامەنوسان جەختی لەسەر ئەوە کردەوە کەشتیەکان بۆ تێپەڕین بە گەرووی هورمز دەبێت لەگەڵ ئێران هەماهەنگی بکەن.
بەقائی سەبارەت بە لێدوانەکانی ئەم دواییەی سەرۆکی ئەمریکا ترەمپ کە دەڵێت ئەمریکا هاوکاری ئەو کەشتییانە دەکات کە دەیانەوێت بە گەرووی هورمزدا تێپەڕن و ئەم کارە ئۆپەراسیۆنێکی مرۆییە، وەڵامی ئێران بۆ ئەو لێدوانانە چییە؟ وتیشی: ئەوانەی بەرپرسیارن لە وەڵامدانەوەی ئەم جۆرە جموجۆڵ و کردەوە نایاساییانە ئامادەکاری باشیان کردووە و دەزانن چۆن بەرگری لە بەرژەوەندییە نەتەوەییەکانی وڵات بکەن و لەو بارەوە شایەتی بەیاننامەی فەرماندەیی بنکەی خاتەمولئەنبیا لە سەرلەبەیانی ئەمڕۆ (دووشەممە) بووین.
بەقائی جەختی لەوە کردەوە کە جیهان بانگەشەی مرۆیی ئەمریکا قبوڵ ناکات و باوەڕی بەوە نییە کە بە دووبارەکردنەوەی هەڵەکانی ڕابردوو بتوانێت لەم تاڵاوە خۆدروستە دەربچێت کە کێشەی زۆری بۆ هەمووان دروست کردووە، دەشڵێت: ئەمریکا دەبێ ئەم وانەیەی فێربووبێت کە ناتوانێت زمانی هەڕەشە و هێز لە دژی ئێران بەکاربهێنێت و ئێرانیش خۆی بە پارێزەری گەرووی هورمز دەزانێت.
وتەبێژی وەزارەتی دەرەوەی ئێران جەختی کرد: بێگومان کەشتی و خاوەن کەشتییەکان زۆر باش دەزانن کە دەبێت هەماهەنگی لەگەڵ دەسەڵاتدارانی کارامەی ئێران بکەن بۆ دڵنیابوون لە ئاسایشی خۆیان.
ڕاشیگەیاند: ئێران و عومان دەبێت میکانیزمێکی دیاریکراو بۆ دەستەبەرکردنی هاتوچۆی کەشتیوانی سەلامەت لە گەرووی هورمز دیاری بکەن.