جام کوردی - یانەی دیلانی فەلەستین ڕایگەیاند کە ژمارەی ژنانی دیلی فەلەستینی لە زیندانەکانی ڕژێمی زایۆنی لە مانگی نیسانی ئەمساڵدا بۆ ٩٠ کەس بەرز بووەتەوە؛ ژمارەیەک کە پێشتریش لە لوتکەی شەپۆلی دەستبەسەرکردنەکان لە کەناری ڕۆژئاوا لە سەرەتای شەڕدا تۆمار کرابوو.
بەپێی ئەم ڕاپۆرتە، زۆربەی ئەم ژنانە لە زیندانی دامون ڕادەگیرێن کە لەنێویاندا دوو منداڵ، ژنێکی دووگیان لە مانگی سێیەمدا، ٢٥ دەستبەسەرکراوی کارگێڕی، سێ ڕۆژنامەنووس، دوو نەخۆشی تووشبوو بە شێرپەنجە و هەروەها دوو دیل کە لە پێش دەستپێکردنی شەڕەوە دەستبەسەر کراون، بوونیان هەیە.
ئەم دامەزراوەیە زیادی کرد کە ژنانی دیل ڕووبەڕووی بارودۆخی سەخت لەوانە برسێتی، بێبەشکردنی بەربڵاو، فەرامۆشیی پزیشکی، مامەڵەی خراپ، ڕاگرتن لە ژووری تاکەکەسی و جۆرەها دەستدرێژی لەوانە پشکنینی جەستەییی سووکایەتیپێکارانە بوونەتەوە.
بەپێی ئەم ڕاپۆرتە، زۆربەی دەستبەسەرکردنەکان بە بانگەشەی «هاندان بۆ توندوتیژی و هەنگاوەکانی دژەزایۆنی» ئەنجام دەدرێن و کۆی گشتیی ژمارەی دەستبەسەرکردنی ژنان لە سەرەتای شەڕەوە گەیشتووەتە نزیکەی ٧٠٠ حاڵەت کە کەناری ڕۆژئاوا، قودس و ناوچە داگیرکراوەکانی ١٩٤٨ دەگرێتەوە، لە کاتێکدا کە ئامارێکی ورد لە دەستبەسەرکردنە ئەنجامدراوەکان لە غەززە لەبەر دەستدا نییە.