جام کوردی - سەید عەباس عێراقچی، وەزیری دەرەوەی ئێران، لە کۆبوونەوەی سییەمی وەزیرانی دەرەوەی ڕێکخراوی هاوکاریی ئابووریی (ئێکۆ)، بازرگانی، گواستنەوە و وزەی بە سێ ستوونی ستراتیژیی هاوکاریی ناوچەیی ناوبرد و جەختی لە پێویستیی بەهێزکردنی هاوگرێیی ئابووری کردەوە.

عێراقچی کە دووشەممە لەم کۆبوونەوەیەدا قسەی دەکرد، وتی پەرەپێدانی پەیوەندییە ناوچەییەکان، ئاسانکاریی بازرگانیی ناوخۆی ناوچە و هاوکاریی وزە، دەتوانێت توانای بەرگەگرتنی وڵاتانی ئەندام زیاد بکات و کاریگەریی هۆکارە دەرەکییەکان کەم بکاتەوە. ئەو هەروەها پشتیوانیی ئێرانی لە پێکهێنانی لیژنەیەکی تەکنیکی بۆ پێداچوونەوە بە ڕێککەوتنی بازرگانیی ئەکۆ (ئێکۆتا) ڕاگەیاند و داوای کرد وڵاتانی ئەندام بە شێوەیەکی چالاک بە گفتوگۆکانەوە بپەیوەستن.

وەزیری دەرەوەی ئێران لە بەشی دیکەی قسەکانی، کردارەکانی ئەمریکا و ئیسرائیلی بە هۆکاری نائارامیی کەنداوی فارس و ئاڵۆزییەکانی دەوروبەری تەنگەی هۆرمز دانا. بە وتەی ئەو، ئێران پابەندیی خۆی بە یاسای نێودەوڵەتی و چارەسەری ئاشتییانەی ناکۆکییەکان پاراستووە، بەڵام هەنگاوەکانی ئەمریکا، لەوانە هێرش، هەڕەشە و فشارە ئابوورییەکان، پێشێلکردنی یاسای نێودەوڵەتین.

عێراقچی وتی ئێران خوازیاری پەیوەندییەکی دۆستانە و سازێنەر لەگەڵ دراوسێکانییەتی و جیاوازیی بنەڕەتیی لەگەڵ وڵاتانی ناوچەکە نییە. بەڵام جەختی کردەوە خاک، ئاسمان و دامەزراوەکانی وڵاتانی ناوچە نابێت ببنە بنکەی هێرش بۆ سەر وڵاتێکی تر. ئەو هەروەها داوای گفتوگۆیەکی ڕاستەقینە و فراوانی ناوچەیی کرد، بە ئامانجی دامەزراندنی ڕێکخستنە ئەمنییەکان لەسەر بنەمای نەکردنی هێرش.